భార‌త్‌లో ఇ-కామ‌ర్స్ ఇంత వేగంగా విస్త‌రిస్తుందో తెలియంది కాదు. ప్ర‌స్తుతం ఉన్న ఇ-కామ‌ర్స్ సైట్ల‌తో పాటు కొత్త కొత్త సైట్లు వినియోగ‌దారుల కోసం పుడుతున్నాయి.  స్టార్ట‌ప్ ఇండియా, మేక్ ఇన్ ఇండియా ప‌థ‌కాల్లో భాగంగా ఇ-కామ‌ర్స్ సైట్ల సంఖ్య ఇబ్బుడిముబ్బుడిగా పెరిగిపోయింది. స‌మ‌యం, శ్ర‌మ క‌లిసి వ‌స్తుండ‌టంతో ఎక్కువ‌మంది ఇంట‌ర్నెట్ యూజ‌ర్లు ఆన్‌లైన్‌లో కొనుగోలు చేయ‌డానికే ఇష్ట‌ప‌డుతున్నారు. ఇక అమ్మ‌కందారుల‌కు ఆన్‌లైన్ సైట్లు క‌ల్ప‌త‌రువుగా మారాయి.  ఈ నేప‌థ్యంలో ఇ-కామ‌ర్స్ ఆదాయం కూడా ఊహించ‌లేనంత వేగంగా పెరిగింది. తాజా లెక్క‌ల ప్ర‌కారం 2016 ఏడాది ఆఖ‌రికి భార‌త్‌లో ఇ-కామ‌ర్స్ ఆదాయం రూ.2 ల‌క్ష‌ల కోట్ల‌కు చేరుకునే అవ‌కాశం ఉంద‌ని అంచ‌నా.  ఈ విష‌యాన్ని ఇంట‌ర్నెట్ అండ్ మొబైల్ అసోసియేష‌న్ ఆఫ్ ఇండియా త‌న స‌ర్వే ద్వారా తెలిపింది.  డిసెంబ‌ర్ 2011 నుంచి డిసెంబ‌ర్ 2015 మ‌ధ్య కాలంలో భార‌త్‌లో ఇ-కామ‌ర్స్ వ్యాపారం 30 శాతం పెరిగింది ఈ స‌ర్వే పేర్కొంది.  ఈ మ‌ధ్య కాలంలో రూ.1,25,732 కోట్ల వ్యాపారం జ‌రిగింద‌ట‌.

ముఖ్యంగా ఈ ఆన్‌లైన్ వ్యాపారంలో ఎక్కువ‌శాతం ఆదాయం ఆన్‌లైన్ ట్రావెల్స్ ప‌రిశ్ర‌మ‌ల నుంచి వ‌చ్చాయ‌ట‌. డొమెస్టిక్ ఎయిర్ టిక్కెట్స్‌తో పాటు రైల్వే బుకింగ్స్‌, బ‌స్ బుక్సింగ్ ద్వారా ఇ-కామ‌ర్స్ సైట్లు లాభాల‌ను ఆర్జించాయి.  కేవ‌లం ఆన్‌లైన్ ట్రావెల్స్ ద్వారానే ఇ-కామ‌ర్స్ ఆదాయం 40 శాతం పెరిగింద‌ని ఈ స‌ర్వే తెలిపింది.  ఆన్‌లైన్ ట్రావెల్స్ ద్వారా రూ.1,22,815 కోట్ల ఆదాయం స‌మ‌కూరింద‌ట‌.  అంతేకాదు డిసెంబ‌ర్ 2015లో హోట‌ల్ బుకింగ్ బిజినెస్ కూడా ఊపందుకుంది. ఈ రంగంలో రూ.5200 కోట్ల ఆదాయం వ‌చ్చింద‌ట‌. రైల్వే టిక్కెట్ల‌కు కూడా వినియోగ‌దారులు బాగానే ఖ‌ర్చు చేశారు.  రూ.21,708 కోట్లు రైల్వే ఆన్‌లైన్ టిక్కెట్ల ద్వారా ఆదాయం వ‌చ్చింది.