• వార్తా విశ్లేషణ /
• 02 Oct 2026, 11:29 PM /

చాట్ జీపీటీ.. ఏ చిన్న‌ అంశానికి సంబంధించిన స‌మాచారం అయినా క్ష‌ణాల్లో మ‌న ముందుంచే ఏఐ. దీనిని త‌యారు చేసింది ఎవ‌రు అంటే ఠ‌క్కున గుర్తొచ్చే పేరు ఓపెన్ ఏఐ కంపెనీ. ఏఐ మార్కెట్‌లో తిరుగులేని శ‌క్తిగా ఉన్న చాట్ జీపీటీ వ‌ల్ల ఓపెన్ ఏఐ కంపెనీకి కోట్ల‌లో ఆదాయం వ‌స్తుందిలే అని అనుకుంటాం. కానీ ఓపెన్ ఏఐ కంపెనీకి కాకుండా టెక్ దిగ్గ‌జం అయిన మైక్రోసాఫ్ట్‌కు ఈ చాట్ జీపీటీ.. కోట్ల ఆదాయం తెచ్చి పెడుతోందంటే న‌మ్మ‌గ‌ల‌రా? అది కూడా రోజుకు ఎంతో తెలుసా సుమారు రూ.551 కోట్లు ($66.03 మిలియన్ డాలర్లు). విన‌డానికి ఆశ్చ‌ర్యంగా ఉన్నాఇదే నిజం. ఇదేంటి చాట్ జీపీటీ వ‌ల్ల అంత ఆదాయం మైక్రోసాఫ్ట్‌కు ఎందుకు వ‌స్తోంది? ఎలా వ‌స్తోంది? అనే సందేహాలు రాక మాన‌వు. ఇప్పుడు వీటికి సమాధానాలు వివ‌రంగా తెలుసుకుందాం!

మైక్రోసాఫ్ట్ ఎలా వచ్చింది?
అలా మొద‌లైంది: ఓపెన్ఏఐ (OpenAI) సంస్థ 2015లో ఒక లాభాపేక్ష లేని పరిశోధనా సంస్థగా ప్రారంభమైంది. భవిష్యత్తు అంతా ఏఐ (AI) దేనని ఊహించిన అప్ప‌టి మైక్రోసాఫ్ట్ సీఈవో సత్య నాదెళ్ల, 2019లో ఓపెన్ఏఐ టెక్నాలజీని గుర్తించి వారితో చేతులు కలిపారు. వారి పరిశోధనలను నమ్మి మైక్రోసాఫ్ట్ ముందడుగు వేసింది.
ఒక‌టితో మొద‌లై..: 2019లో $1 బిలియన్ డాలర్లు (సుమారు రూ. 7,041 కోట్లు అప్ప‌ట్లో) పెట్టుబడితో ప్రారంభిం చింది. ఆ తర్వాత చాట్ జీపీటీ సృష్టించిన సంచలనాన్ని చూసి పెట్టుబడులను పెంచింది. ఇప్పటివరకు ఓపెన్ఏఐలో దాదాపు $13 బిలియన్ డాలర్ల (సుమారు రూ. 1.08 లక్షల కోట్లు) పెట్టుబ‌డిగా పెట్టింది.
దాదాపు 27% వాటా: ఓపెన్ ఏఐ 'ఫర్-ప్రాఫిట్' (లాభాపేక్ష గల) వాణిజ్య విభాగాన్ని ఏర్పాటుచేసింది. మైక్రోసాఫ్ట్ పెట్టుబడులకు ప్రతిఫలంగా ఈ విభాగంలో 27% ఈక్విటీ వాటాను దక్కించుకుంది. దీనివల్ల ఓపెన్ ఏఐ భవిష్యత్తులో సాధించే లాభాల్లో మరియు దాని మార్కెట్ విలువలో మైక్రోసాఫ్ట్‌కు నేరుగా మూడో వంతు లభిస్తుంది.

రోజుకు రూ. 551 కోట్లు ఎలా?
కంప్యూటింగ్‌కే అధికం: చాట్ జీపీటీని నడపడానికి, దానికి అవసరమైన ఏఐ మోడల్స్ శిక్షణకు Azure సర్వీసులను వాడుకున్నందుకు భారీగా కంప్యూటింగ్ ఫీజుల‌ను ఓపెన్ ఏఐ చెల్లిస్తుంది.
ఇది నికర లాభం కాదు: ఈ రోజువారీ ఆదాయం మైక్రోసాఫ్ట్ పొందే రాబడి మాత్రమే. ఏఐ డేటా సెంటర్ల నిర్వహణ, సూపర్ కంప్యూటర్ల విద్యుత్ ఖర్చులు, గ్రాఫిక్స్ ప్రాసెసింగ్ యూనిట్ల నిర్వహణ ఖర్చులు ఇందులో ఉంటాయి.
ఆదాయ వృద్ధి: ఓపెన్ఏఐ యొక్క వార్షిక రాబడి వేగంగా పెరుగుతుండటంతో (ప్రస్తుతం వార్షిక రన్ రేట్ దాదాపు $70 బిలియన్ డాలర్లకు చేరువైంది). మైక్రోసాఫ్ట్ పొందే రోజువారీ క్లౌడ్ ఆదాయం కూడా నిరంతరం పెరుగుతోంది.

బిలియ‌న్లలో ఆదాయం.. త‌గ్గ‌ట్టే ఖర్చు
వార్షికంగా బిలియన్ల కొద్దీ ఆదాయం కనిపిస్తున్నప్పటికీ, మైక్రోసాఫ్ట్ క్లౌడ్ విభాగం యొక్క గ్రాస్ మార్జిన్ (Gross Margin) 66 శాతానికి తగ్గింది. చాట్‌జీపీటీ వంటి ఏఐ టెక్నాలజీల కోసం ఏర్పాటు చేసే డేటా సెంటర్లు, సూపర్ కంప్యూటర్లు, GPUsకి విపరీతమైన విద్యుత్‌ను, ఖర్చును డిమాండ్ చేయడమే ఇందుకు ప్ర‌ధాన కార‌ణం.

ఇదొక తెలివైన మైండ్ గేమ్
ఆర్థిక విశ్లేషకుల ప్రకారం, మైక్రోసాఫ్ట్ చూపించే ఈ ఏఐ ఆదాయంలో ఎక్కువ భాగం ఒక లూప్ లాగా సాగుతుంది.
మొదట: మైక్రోసాఫ్ట్ సంస్థ ఓపెన్ఏఐలో బిలియన్ల కొద్దీ డాలర్లను పెట్టుబడిగా పెడుతుంది.
తర్వాత: ఓపెన్ఏఐ తన చాట్‌జీపీటీ మోడల్స్‌ను నడపడానికి మరియు శిక్షణ ఇవ్వడానికి అదే డబ్బును Microsoft Azure క్లౌడ్ సర్వర్ల రెంట్ రూపంలో తిరిగి మైక్రోసాఫ్ట్‌కే చెల్లిస్తుంది.
ఏం జ‌రుగుతుంది: దీనివల్ల మైక్రోసాఫ్ట్ పెట్టిన పెట్టుబడే తిరిగి దానికి "ఏఐ క్లౌడ్ రాబడి" రూపంలో వెనక్కి వస్తుంది.

చాట్‌జీపీటీ కోసం మైక్రోసాఫ్ట్ ఏఐ చిప్స్
ఎన్వీడియా చిప్‌ల కొర‌త‌: చాట్‌జీపీటీ వంటి ఏఐ మోడల్స్‌ను నడపడానికి ఎన్విడియా (Nvidia) కంపెనీకి చెందిన గ్రాఫిక్స్ చిప్స్ (GPUs) అత్యంత కీలకం. అయితే ప్రస్తుతం మార్కెట్‌లో వీటికి విపరీతమైన కొరత ఉంది.
ఖ‌ర్చుల ఆదా కోసం: ఎన్విడియా చిప్‌లపై ఆధారపడటాన్ని తగ్గించడానికి, చాట్‌జీపీటీ సర్వర్ల ఖర్చులను అదుపు చేయడానికి మైక్రోసాఫ్ట్ తన అజూర్ క్లౌడ్ డేటా సెంటర్లలో స్వంత ఏఐ చిప్‌లను ప్రవేశపెట్టింది.
Maia 200: మొదట రూపొందించిన Maia 100 చిప్ తర్వాత, అత్యాధునిక 3nm ప్రాసెస్ టెక్నాలజీతో కూడిన Maia 200 ఇన్ఫరెన్స్ యాక్సిలరేటర్ చిప్‌ను మార్కెట్లోకి తెచ్చింది. ఇది చాట్‌జీపీటీ వంటి మోడల్స్ సమాధానాలను జనరేట్ చేసే వేగాన్ని పెంచడమే కాకుండా, మైక్రోసాఫ్ట్‌కు ఏఐ టోకెన్ జనరేషన్ ఖర్చులను భారీగా తగ్గిస్తుంది.

మీకు స‌ర్వ‌ర్లు.. మాకు ఏఐ మోడ‌ల్స్
మైక్రోసాఫ్ట్ ఉత్పత్తుల్లో ఏఐ కోడ్‌: ఓపెన్ఏఐకి కేవలం సర్వర్లు ఇవ్వడమే కాకుండా, చాట్‌జీపీటీ వెనుక ఉన్న GPT-4o, o1 వంటి పవర్‌ఫుల్ ఏఐ మోడల్స్ కోడ్‌ను మైక్రోసాఫ్ట్ తన ఉత్పత్తుల్లో వాడుకునే హక్కులను పొందింది.
మైక్రోసాఫ్ట్ కోపైలట్‌: విండోస్ లాప్‌టాప్‌లు, వర్డ్, ఎక్సెల్, మరియు బింగ్ సెర్చ్ ఇంజిన్‌లో వచ్చే ఏఐ ఫీచర్లు అన్నీ చాట్‌జీపీటీ సాంకేతికతతోనే పనిచేస్తున్నాయి.
ఏఐ సేవ‌లు అమ్మ‌కంతో ఆదాయం: దీనివల్ల మైక్రోసాఫ్ట్ తన క్లౌడ్ కస్టమర్లకు మరియు ఎంటర్‌ప్రైజ్ (కార్పొరేట్) కంపెనీలకు ప్రీమియం ఏఐ సేవలను అమ్మి అదనంగా బిలియన్ల కొద్దీ డాలర్లను సంపాదిస్తోంది.

సుమారు రూ. 21 ల‌క్ష‌ల కోట్లతో కాంట్రాక్ట్
ఓపెన్ఏఐ సంస్థ భవిష్యత్తు అవసరాల కోసం మైక్రోసాఫ్ట్‌తో ఏకంగా $250 బిలియన్ డాలర్ల (దాదాపు రూ. 21 లక్షల కోట్లు)తో ఒప్పందాన్ని కుదుర్చుకుంది. దీని ప్రకారం రాబోయే సంవత్సరాల్లో ఓపెన్ఏఐ తన కంప్యూటింగ్ అవసరాల కోసం మైక్రోసాఫ్ట్ అజూర్ క్లౌడ్‌ను భారీ స్థాయిలో ఉపయోగించనుంది.

లాభాల పంప‌కాలు.. పరిమితులు
20 శాతం వాటా.. 2030 వ‌ర‌కే: ఓపెన్ఏఐ పొందే లాభాల్లో మైక్రోసాఫ్ట్‌కు 20% వరకు వాటా లభిస్తుంది. అయితే, ఈ రెవెన్యూ షేరింగ్ 2030 వరకు మాత్రమే చెల్లుబాటు అవుతుంది.
గ‌రిష్టంగా ఎంతంటే: ఇటీవల ఇరు కంపెనీలు ఈ లాభాల పంపకానికి గరిష్టంగా $38 బిలియన్ డాలర్ల (సుమారు రూ. 3.1 లక్షల కోట్లు) పరిమితి విధించుకున్నాయి. అంటే, ఓపెన్ఏఐ ఎంత సంపాదించినా మైక్రోసాఫ్ట్‌కు వచ్చే వాటా ఈ పరిమితి దాటదు.

ఇరు కంపెనీల మధ్య పోటీ
పైకి రెండు కంపెనీలు భాగస్వాములుగా కనిపిస్తున్నా.. లోపల మాత్రం ఒక దానితో మ‌రొక‌టి పోటీ పడుతున్నాయి.
కార్పొరేట్ కస్టమర్ల కోసం పోటీ: మైక్రోసాఫ్ట్ తన అజూర్ క్లౌడ్ ద్వారా పెద్ద కంపెనీలకు చాట్‌జీపీటీ టెక్నాలజీని అమ్ముతోంది. అదే సమయంలో, ఓపెన్ఏఐ కూడా సొంతంగా "ChatGPT Enterprise" పేరుతో నేరుగా పెద్ద కంపెనీలకు తన సేవలను అమ్ముతోంది. దీనివల్ల ఇద్దరూ ఒకే కస్టమర్ కోసం పోటీ పడాల్సి వస్తోంది.
ఆపిల్ ఒప్పందం: ఐఫోన్లలో చాట్‌జీపీటీని ఉచితంగా ఇంటిగ్రేట్‌ చేయడానికి ఆపిల్ కంపెనీతో ఓపెన్ఏఐ ఒప్పందం చేసుకుంది. ఇది మైక్రోసాఫ్ట్ యొక్క విండోస్/కోపైలట్ వ్యాపారానికి కొంతవరకు సవాలుగా మారింది.

chatgpt revenue microsoft chatgpt how microsoft making money from chatgpt microsoft investment chatgpt openai revenue microsoft ai openai microsoft openai chatgpt