• వార్తా విశ్లేషణ /
• 18 Oct 2026, 09:57 AM /

ఫ్రీ సిమ్.. ఉచిత మొబైల్ డేటా.. అన్‌లిమిటెడ్ కాల్స్.. చేతికి నప్పే ₹10 నుంచి ₹15 వేల స్మార్ట్‌ఫోన్.. ఒకప్పుడు కొత్త ఫోన్ కొనడానికి ఇవి చాలు. కానీ, మారుతున్న కాలంతో పాటు స్మార్ట్‌ఫోన్ అనేది అవసరం నుంచి స్టాటస్ సింబల్‌గా మారిపోయింది. సరిగ్గా ఇదే క్రేజ్ మనదేశంలో టెక్ జర్నలిజానికి బలమైన పునాది వేసింది. కాలక్రమేణా ఆ జర్నలిజమే.. నేడు బ్రాండ్లను పొగిడే టెక్ ఇన్‌ఫ్లూయెన్సింగ్‌గా మారింది. అసలు ఈ టెక్ జర్నలిజం ఎప్పుడు, ఎలా మొదలైంది? మొబైల్ ప్రమోట్ చేయడమే టెక్ జర్నలిజం అనే స్థాయికి ఎలా మారింది? ఈ విష‌యాల‌ను ఇప్పుడు తెలుసుకుందాం!

ఎప్పుడు ప్రారంభమైంది?
గ్లోబల్ స్మార్ట్‌ఫోన్ ఎరా (2007 - 2012): ఆపిల్ ఐఫోన్, ఆండ్రాయిడ్ రాక‌తో ప్రపంచం కంప్యూటర్ల నుంచి మొబైల్స్ వైపు షిఫ్ట్ అయింది. టెక్ మీడియా కూడా డెస్క్‌టాప్‌ను పక్కనబెట్టి మొబైల్స్ కవర్ చేయడం ప్రారంభించింది.
జియో బూమ్ (2016 - ప్రెసెంట్): ఉచిత/చౌక డేటా అంటూ జియో ఎంట్రీ ఇచ్చింది. ఇదే స‌మ‌యంలో చైనా స్మార్ట్‌ఫోన్‌ బ్రాండ్లు దేశంలోకి వరదలా ప్రవేశించాయి. వారానికో బ‌డ్జెట్‌ స్మార్ట్‌ఫోన్ మార్కెట్‌లోకి వ‌చ్చాయి.
యూట్యూబ్‌ అన్‌బాక్సింగ్ ట్రెండ్‌: ఇదే సమయంలో యూట్యూబ్‌లో టెక్ ఇన్‌ఫ్యూయెన్స‌ర్లు మరియు అన్‌బాక్సింగ్ ఛానెళ్లు పెరిగాయి.  స్మార్ట్‌ఫోన్ గురించి తెలుసుకునే వారి సంఖ్య పెరిగింది.

ఎలా మారిపోయింది?
టెక్ జర్నలిజం కేవలం మొబైల్ ప్రమోషన్‌లా మారడానికి వెనుక బలమైన ఆర్థిక, సామాజిక కారణాలు ఉన్నాయి.
బ్రాండ్ల చేతుల్లో మీడియా మనుగడ!
కంటెంట్ ఉచితం: ఇంటర్నెట్, సోషల్ మీడియా యుగంలో కంటెంట్ అంతా ఫ్రీ అయిపోయింది. దీనివల్ల వెబ్‌సైట్లకు, యూట్యూబర్లకు గూగుల్ ప్రకటనల ద్వారా వచ్చే ఆదాయం.. జీతాలు ఇవ్వడానికి కూడా సరిపోదు.
మ‌నుగ‌డ కోసం: ఫలితంగా, మీడియా సంస్థలు మనుగడ సాగించడానికి మొబైల్ కంపెనీలు ఇచ్చే డైరెక్ట్ స్పాన్సర్‌షిప్‌లు, పెయిడ్ ప్రమోషన్లపై పూర్తిగా ఆధారపడాల్సి వచ్చింది.
క్లిక్స్‌, వ్యూస్‌.. ఇవే ఇంధ‌నాలు
వ్యూస్ అండ్ క్లిక్స్‌: డిజిటల్ మీడియాను శాసించేది గూగుల్, యూట్యూబ్ అల్గారిథమ్స్. ఇవి వ్యూస్, క్లిక్స్ ఆధారంగా పనిచేస్తాయి. దీంతో ₹15,000 లోపు బెస్ట్ కెమెరా ఫోన్ ఏది?, కొత్త ఐఫోన్ అన్‌బాక్సింగ్ అని రాస్తే లక్షల్లో వ్యూస్ వస్తాయి.
మొబైల్ చుట్టూనే ఆదాయం: వ్యూస్ ఉంటేనే ప్రకటనల ఆదాయం వస్తుంది కాబట్టి, జర్నలిస్టులు సైన్స్ అండ్ టెక్నాలజీని వదిలేసి, కేవలం మొబైల్స్ చుట్టూ తిరగడం ప్రారంభించారు.
మొబైల్ వ్యామోహ‌మే బూస్ట్‌
హైటెక్ గ్యాడ్జెట్ స్మార్ట్‌ఫోన్‌: టెక్నాలజీ చాలా విస్తృతమైనది. కానీ సాధారణ మిడిల్ క్లాస్ మనిషి రోజువారీ జీవితంలో కొనుగోలు చేయగలిగే, అనుభవించగలిగే ఏకైక హై-టెక్ గ్యాడ్జెట్ 'స్మార్ట్‌ఫోన్' మాత్రమే.
రెండేళ్ల‌కోసారి ఫోన్ మార్చాల్సిందే: సాధారణ ప్రజలకు రోబోటిక్స్, సాఫ్ట్‌వేర్ కోడింగ్, లేదా డేటా ప్రైవసీ చట్టాలతో నేరుగా సంబంధం ఉండదు. కానీ ప్రతి 1-2 ఏళ్లకు ఒకసారి వారు కొత్త ఫోన్ కొనాలి లేదా మార్చాలి.
కన్స్యూమర్ డిమాండ్: ఆడియన్స్‌కు ఏది కావాలో, మీడియా అదే అందిస్తుంది (Supply follows Demand). ప్రజల మొబైల్ వ్యామోహమే టెక్ జర్నలిజాన్ని మొబైల్ ప్రమోషన్‌గా మార్చేసింది.
కంపెనీల మార్కెటింగ్ బడ్జెట్
విలాసాలు.. బ‌హుమతులు: స్మార్ట్‌ఫోన్ల‌ కంపెనీలు త‌మ‌ కొత్త ఫోన్ లాంచ్ ఈవెంట్లకు జర్నలిస్టులను విదేశాలకు లేదా ఫైవ్-స్టార్ రిసార్ట్స్‌కు పిలవడం, ఉచితంగా లక్ష రూపాయల ఫోన్లను గిఫ్ట్‌లుగా ఇవ్వడం చేస్తాయి.
బ్లాక్‌లిస్ట్‌లో ఉండ‌లేక‌: ఈ లగ్జరీని అనుభవించిన తర్వాత ఆ ఫోన్‌లోని లోపాలు ధైర్యంగా చూపించ‌లేరు. నిజాయితీగా రివ్యూ ఇస్తే, వారిని 'బ్లాక్‌లిస్ట్' లో పెడతాయి. దీనితో జర్నలిస్టులు కేవలం ప్రమోటర్లుగా మారిపోయారు.
అఫిలియేట్ కమీషన్ల లూప్
కామెంట్లలో లింకులు: ఈరోజు ప్రతి టెక్ వెబ్‌సైట్ లేదా యూట్యూబ్ వీడియో కింద Buy Link అని అమెజాన్ లేదా ఫ్లిప్‌కార్ట్ లింకులు ఉంటాయి.
లింక్ క్లిక్ చేసి కొంటే క‌మీష‌న్‌: ఆ లింక్ ద్వారా ఎవరైనా ఫోన్ కొంటే, ఆ అమ్మకంలో 1% నుండి 3% వరకు కమీషన్ ఆ జర్నలిస్ట్‌కు లేదా వెబ్‌సైట్‌కు వెళ్తుంది.
లాభం కావాలంటే తప్ప‌నిస‌రి: ఒకవేళ ఫోన్ బాలేదు అని చెప్తే జనాలు ఆ ఫోన్ కొనరు, కమీషన్ రాదు. సొంత లాభం కోసం ఫోన్ ఎలా ఉన్నా- అద్భుతంగా ఉంది, కొనేయండి అని ప్రమోట్ చేయక తప్పని పరిస్థితి ఏర్పడింది.
జర్నలిజం స్థానంలో ఇన్‌ఫ్లూయెన్సిజం
గ్లామ‌ర్‌, స్టైలిష్ జ‌ర్న‌లిస్టులు: సోషల్ మీడియా యుగంలో కెమెరా ముందు గ్లామరస్‌గా, స్టైలిష్‌గా మాట్లాడే ఇన్‌ఫ్యూయెన్స‌ర్లే టెక్ జర్నలిస్టులుగా అవతరించారు.
అవ‌గాహ‌న లేమి: వీరికి సాఫ్ట్‌వేర్ ఆర్కిటెక్చర్, హార్డ్‌వేర్ ఇంజనీరింగ్ లేదా సెక్యూరిటీ ప్రోటోకాల్స్‌పై కనీస అవగాహన ఉండదు.
స్క్రిప్ట్ ఫాలో అయితే చాలు: వీరు కేవలం కంపెనీలు ఇచ్చిన ప్రెస్ నోట్ చూసి, బాక్స్ ఓపెన్ చేసి, లుక్ అదిరిపోయింది ఫ్రెండ్స్ అని చెప్తారు. దీనివల్ల టెక్ జర్నలిజం యొక్క ప్రధాన విలువలు మాయమైపోయాయి.
ఎంబార్గో, ఎన్‌డీఏల మాయాజాలం
ముందే సంత‌కాలు: ఏదైనా కొత్త ఫోన్ మార్కెట్లోకి వచ్చే వారం రోజుల ముందే రివ్యూయ‌ర్ల చేతికి వస్తుంది. కానీ దానితో పాటు కంపెనీలు Non-Disclosure Agreement (NDA) పై సంతకం చేయించుకుంటాయి.
ఏముంటాయి అంటే: కంపెనీ చెప్పిన సమయానికి మాత్రమే వీడియో పెట్టాలి. లాంచ్ రోజు కేవలం ఫోన్ లోని పాజిటివ్స్ మాత్రమే చెప్పాలి, నెగటివ్స్ చెప్పకూడదు అని ఉంటాయి.
రూల్స్ దాటితే లీగ‌ల్ యాక్ష‌న్‌: ఒకవేళ ఈ రూల్స్ దాటి ఎవరైనా ముందే నిజాయితీగా రివ్యూ ఇస్తే, వారిపై లీగల్ యాక్షన్ తీసుకునే హక్కు కంపెనీలకు ఉంటుంది.
పీఆర్ బ్లాక్‌లిస్టింగ్
ఏజెన్సీల మాయ: ఒక జర్నలిస్ట్ లేదా యూట్యూబర్ ఒక బ్రాండ్ ఫోన్‌ను టెస్ట్ చేసి, ఈ ఫోన్ హీట్ అవుతోంది, కెమెరా బాలేదు- అని రివ్యూ ఇస్తే.. త‌ర్వాతి రోజు నుంచే ఆ పీఆర్ ఏజెన్సీ రివ్యూయ‌ర్‌ను బ్లాక్‌లిస్ట్‌లో పెడుతుంది.
భ‌యం వెనుక నిజం: దీనివల్ల భవిష్యత్తులో ఆ కంపెనీ నుంచి ఎలాంటి రివ్యూ ఫోన్లు రావు. లాంచ్ ఈవెంట్లకు ఆహ్వానాలు ఉండవు. మార్కెట్లో అందరికంటే వెనుకబడిపోతామనే భయంతో జర్నలిస్టులు నిజాలు దాచేస్తున్నారు.

ఉచితంగా కంటెంట్ కోరుకునే ప్రేక్షకులు, లాభాలు మాత్రమే చూసుకునే కంపెనీలు, వ్యూస్ కోసం ఆరాటపడే అల్గారిథమ్స్, టెక్నిక‌ల్ నాలెడ్జీ స‌రిగ్గా లేని ఇన్‌ఫ్యూయెన్స‌ర్లు.. ఇవ‌న్నీ కలిసి టెక్ జర్నలిజం స్వ‌రూపాన్ని పూర్తిగా మార్చేశాయి.

TechJournalism SmartphoneReviews InfluencerMarketing TechIndustrySecrets UnboxingCulture DigitalMediaTrends AffiliateMarketing PRTraps GadgetReviews MediaEthics