సెలబ్రిటీల ఫొటోలు, పేర్లను అనుమతి లేకుండా వాణిజ్య ప్రకటనల్లో వాడితే కేసులు పడటం మనం చూస్తుంటాం. కానీ, తన రూపాన్ని కాపీ కొట్టారంటూ ఏకంగా బ్లింకిట్ వంటి పెద్ద సంస్థపై న్యాయపోరాటానికి దిగారు ఓ క్రికెట్ అభిమాని. ఆయనే శరవణన్ హరి. ఇతని పేరు చాలామందికి తెలియకపోవచ్చు కానీ.. రూపం మాత్రం క్రికెట్ ప్రేమికులందరికీ సుపరిచితమే. ఒంటినిండా పసుపు రంగు, ఛాతీపై 'ధోనీ 7' పేరుతో స్టేడియంలో సందడి చేసే చెన్నై సూపర్ కింగ్స్ (CSK) వీరాభిమాని ఆయన. మరి శరవణన్ హరికి, బ్లింకిట్కి మధ్య వచ్చిన గొడవేంటి? కోర్టు ఈ విషయంలో ఏం చెప్పింది? పూర్తి వివరాలు తెలుసుకుందాం!
అసలు వివాదం ఏంటి?
ప్రత్యేక గుర్తింపు ఉన్న అభిమాని: ఒంటినిండా పసుపు రంగు (Yellow) పూసుకుని, ఛాతీపై ధోనీ పేరు, 7వ నంబర్ రాసుకుని సందడి చేసే శరవణన్ హరి చెన్నై సూపర్ కింగ్స్ (CSK) జట్టుకు, ఎం.ఎస్. ధోనీకి వీరాభిమాని.
పత్రికలో ప్రకటన: 2025 మార్చి 23న 'ది సండే టైమ్స్' (చెన్నై ఎడిషన్)లో క్విక్-కామర్స్ సంస్థ బ్లింకిట్ (Blinkit) ఒక ప్రకటన ఇచ్చింది. అందులో అచ్చం శరవణన్ హరి వేషధారణ, రూపాన్ని పోలిన ఒక కార్టూన్ బొమ్మను వాడారు.
అనుమతి లేకుండా ప్రచురణ: తనను సంప్రదించకుండా, తన అనుమతి లేకుండా తన ప్రత్యేక రూపాన్ని వాణిజ్య ప్రకటనకు వాడుకున్నారని శరవణన్ ఆరోపించారు.
వ్యక్తిత్వ హక్కుల ఉల్లంఘన: ఇది తన వ్యక్తిత్వ హక్కులను (Personality Rights) ఉల్లంఘించడమేనని, తన ఐడెంటిటీని వ్యాపార లాభాల కోసం వాడుకోవడాన్ని సవాలు చేస్తూ ఆయన మద్రాస్ హైకోర్టును ఆశ్రయించారు.
శరవణన్ ఏం చేశారు?
ఇద్దరిపై కేసు: తన రూపాన్ని అక్రమంగా వాడుకున్నారని బ్లింకిట్ సంస్థతో పాటు, ఆ ప్రకటనను ప్రచురించిన 'టైమ్స్ ఆఫ్ ఇండియా' ప్రచురణకర్త (బెన్నెట్ కోల్మన్ & కో) పై శరవణన్ దావా వేశారు.
ప్రజల్లో అపోహలు: ఆ ప్రకటన చూసిన తన స్నేహితులు, గుర్తుపట్టిన వారు తను బ్లింకిట్కు ప్రచారం (Endorse) చేస్తున్నావా? అని అడుగుతున్నారని ఆయన కోర్టుకు తెలిపారు.
రూపాన్ని వాడకుండా నిషేధం: భవిష్యత్తులో తన రూపాన్ని, ఐడెంటిటీని అనుమతి లేకుండా వాడకుండా తక్షణమే నిషేధం (Injunction) విధించాలని కోర్టును కోరారు.
ఆదాయ లెక్కల డిమాండ్: మార్చి 23, 2025 నుండి చెన్నై, తమిళనాడులలో బ్లింకిట్కు వచ్చిన ఆదాయ లెక్కలను (Books of accounts) కోర్టు ముందుంచాలని డిమాండ్ చేశారు.
నష్టపరిహారం కోసం ప్రయత్నం: తన రూపాన్ని వాడుకుని వారు పొందిన వ్యాపార లాభాలను లెక్కించి, తనకు నష్టపరిహారం ఇప్పించేందుకు ఈ రికార్డులు అవసరమని ఆయన వాదించారు.
బ్లింకిట్ ఏం చెప్పింది?
ఆరోపణల ఖండన: తాము శరవణన్ హరి వ్యక్తిత్వ హక్కులను ఉల్లంఘించలేదని, ప్రకటనలోని కార్టూన్ బొమ్మకు శరవణన్కి ఎటువంటి సంబంధం లేదని బ్లింకిట్ తరపు న్యాయవాదులు కోర్టులో వాదించారు.
ఆ పాత్ర కేవలం ఊహాజనితమే: అది కేవలం ప్రకటన కోసం సృష్టించిన ఒక సాధారణ పాత్ర మాత్రమేనని, శరవణన్ రూపాన్ని ఉద్దేశపూర్వకంగా కాపీ కొట్టలేదని సమర్థించుకునే ప్రయత్నం చేశారు.
ఆ అవకాశమే లేదు: ఆ బొమ్మను చూసి శరవణన్ బ్లింకిట్కు బ్రాండ్ అంబాసిడర్ అని ప్రజలు అనుకునే అవకాశం లేదని, తాము ఎవరి వ్యక్తిగత హక్కులను వ్యాపార అవసరాలకు దుర్వినియోగం చేయలేదని కోర్టుకు తెలిపారు.
కేసు కొట్టివేయాలని విజ్ఞప్తి: శరవణన్ చేసిన ఆరోపణల్లో వాస్తవం లేదని, మధ్యంతర ఉత్తర్వులు ఇవ్వాల్సిన అవసరం లేదని బ్లింకిట్ వాదించింది.
కోర్టు ఏం చెప్పింది?
సామాన్యులకూ హక్కులుంటాయి: రాజ్యాంగం ప్రతి వ్యక్తి హక్కులను కాపాడుతుందని, వ్యక్తిత్వ హక్కులు కేవలం సెలబ్రిటీలకు మాత్రమే పరిమితం కాదని జస్టిస్ పి.బి. బాలాజీ స్పష్టం చేశారు.
బ్లింకిట్ వాదన తిరస్కరణ: బ్లింకిట్ ఇచ్చిన వివరణతో కోర్టు ఏకీభవించలేదు, వారి వాదనలను ప్రాథమికంగా తోసిపుచ్చింది.
స్పష్టమైన పోలిక: ప్రకటనలోని బొమ్మకు, గతంలో మీడియాలో వచ్చిన శరవణన్ రూపాలకు స్పష్టమైన పోలిక ఉందని కోర్టు గుర్తించింది.
ప్రజలు తప్పుదారి పడతారు: ఆ ప్రకటన చూసి సామాన్య ప్రజలు అది శరవణన్ అని, ఆయన బ్లింకిట్కు ప్రచారం చేస్తున్నారని పొరబడే అవకాశం ఉందని కోర్టు అభిప్రాయపడింది.
వాణిజ్య దుర్వినియోగం తగదు: అది వ్యాపార ప్రకటన కాబట్టి, శరవణన్ ముందస్తు అనుమతి లేకుండా ఆయన వ్యక్తిత్వ హక్కులను లాభాల కోసం వాడుకోవడం నేరమని పేర్కొంది.
మధ్యంతర నిషేధం: శరవణన్ రాతపూర్వక అనుమతి లేకుండా ఆయన రూపాన్ని, వ్యక్తిత్వాన్ని వాడకూడదని బ్లింకిట్పై కోర్టు మధ్యంతర నిషేధం విధించింది.
రికార్డులు భద్రపరచాలి: ప్రకటనకు సంబంధించిన ఆర్ట్వర్క్, డిజైన్ రికార్డులు, బయటి వెండర్లతో జరిగిన సంభాషణలను నాశనం చేయకుండా భద్రపరచాలని ఆదేశించింది.
CSK Fan Case Against Blinkit Blinkit Lawsuit Saravanan Hari Chennai Super Kings MS Dhoni Fan Blinkit Controversy CSK Superfan Personality Rights Madras High Court Personality Rights in India Commercial Exploitation Interim Injunction Times of India Advertisement Legal News India