• - వార్తా విశ్లేషణ /
• 7 సంవత్సరాల క్రితం /

స్మార్ట్ ఫోన్ మార్కెట్ ను రోజుకో కొత్త మోడల్ ముంచెత్తుతోంది. ఫలితంగా కొన్ని కంపెనీలు పోటీలో నిలిచేందుకు గాను, తమ అమ్మకాలపై ప్రభావం పడకుండా చూసుకునేందుకు గాను రకరకాల బిజినెస్ వ్యూహాలు రచిస్తున్నాయి. కొన్నయితే కొంతమేర ధరలు కూడా తగ్గిస్తున్నాయి. అలా ఇటీవల కాలంలో పలు స్మార్టుఫోన్ల ధరలు తగ్గాయి. రూ.2 వేల నుంచి రూ.10 వేల వరకు తగ్గింపు రావడంతో చాలామంది కొనుగోలుకు ఇదే మంచి తరుణంగా భావిస్తున్నారు.
రూ.10 వేలు తగ్గిన సోని ఎక్స్ పీరియా ఎక్స్ జెడ్
సోని ఇటీవలే తన లేటెస్ట్ ఫ్లాగ్ షిప్ డివైజ్ ఎక్స్ పీరియా ఎక్స్ జెడ్ ధరను భారీగా తగ్గించింది. లాంచింగ్ సమయంలో రూ.51,990గా ఉన్న ఈ స్మార్ట్ ఫోన్ ను ప్రస్తుతం 41వేల రూపాయలకే అందుబాటులో ఉంచింది. అంటే 10వేల రూపాయల తగ్గించేసిందన్నమాట.
రూ.10 వేలు తగ్గిన హెచ్ టీసీ 10
హెచ్ టీసీ మరో స్మార్ట్ ఫోన్ పై 10వేల రూపాయల ధర తగ్గించింది. 52,990 రూపాయలకు అందుబాటులో ఉన్న హెచ్ టీసీ 10ను 10వేల రూపాయలు తగ్గించి, 42,990 రూపాయలకు అందుబాటులోకి తెచ్చింది.
రూ.7 వేలు తగ్గిన హెచ్ టీసీ యూ ఆల్ట్రా
లాంచ్ అయిన నెలల్లోపే తన లేటెస్ట్ స్మార్ట్ ఫోన్ ధరను హెచ్ టీసీ తగ్గించేసింది. ఐఫోన్ 7 కంటే మించిన ధరల్లో గత నెల హెచ్ టీసీ యు ఆల్ట్రా స్మార్ట్ ఫోన్ ను లాంచ్ చేసిన సంగతి తెలిసిందే. లాంచింగ్ సమయంలో 59,990గా ఉన్న దీని ధరను, కేవలం ఒకే ఒక్క నెలల్లోనే 7వేల రూపాయలు తగ్గించేసింది. ప్రస్తుతం ఈ ఫోన్ 52,990లకే అందుబాటులో ఉంది.
రూ.2600 తగ్గిన శాంసంగ్ ఏ9 ప్రొ
శాంసంగ్ కూడా గతేడాది సెప్టెంబర్ లో తీసుకొచ్చిన ఏ9 ప్రొపై ధరను కొంతమేర తగ్గించింది. రూ.32,490కు లాంచ్ చేసిన ఫోన్ ధరను రూ.2590 తగ్గిస్తూ 29,900 రూపాయలకు అందుబాటులో ఉంచుతున్నట్టు పేర్కొంది. ఈ ఫోన్ స్పెషల్ అట్రాక్షన్ 5000 ఏంఏహెచ్ బ్యాటరీ.
రూ.2 వేలు తగ్గిన మోటో జీ4 ప్లస్(16జీబీ వేరియంట్)
అతిపెద్ద స్ట్రీన్ వేరియంట్ మోటో జీ4 ప్లస్ తన రెండు స్టోరేజ్ వేరియంట్లపై ధరను తగ్గిస్తున్నట్టు ప్రకటించింది. 2000 రూపాయల మేర ధర తగ్గించి ఆ ఫోన్ 16జీబీ వేరియంట్ ను 11, 999కే అందుబాటులో ఉంచుతున్నట్టు పేర్కొంది. ఈ వేరియంట్ అసలు ధర 13,999 రూపాయలు. 32జీబీ వెర్షన్ పై కూడా 1000 కట్ చేసి, 13,999కే అందుబాటులోకి తెచ్చింది. అలాగే మోటో జీ4 ధర కూడా రెండు వేల రూపాయల తగ్గి, 10,499కు వినియోగదారుల ముందుకొచ్చింది.
రూ.3 వేలు తగ్గిన లెనోవో జెడ్ 2 ప్లస్
లెనోవో ఈ స్మార్ట్ ఫోన్ ను 2016 సెప్టెంబర్ లో లాంచ్ చేసింది. 3జీబీ ర్యామ్, 4జీబీ ర్యామ్ వేరియంట్లలో విడుదలైన ఈ ఫోన్ ధరను కంపెనీ 3000 రూపాయల మేర తగ్గించింది. 3జీబీ వేరియంట్ పై 3000రూపాయలు, 4జీబీ వేరియంట్ పై 2500 రూపాయలు ధర కోత పెడుతున్నట్టు ప్రకటించింది. ప్రస్తుతం 3జీబీ వేరియంట్ ధర రూ.14,999కు, 4జీబీ వేరియంట్ ధర రూ.17,499కు అందుబాటులో ఉన్నాయి.
రూ.3 వేలు తగ్గిన వివో వై51ఎల్ 4జీ
11980 రూపాయలకు లాంచ్ అయిన వివో వై51ఎల్ 4జీ స్మార్ట్ ఫోన్ ధర కూడా 2990 రూపాయలు తగ్గి, 8990కు అందుబాటులో ఉంది.